ప్లుటోమురస్ ఆర్టొబాలగనెన్సిస్ , అంటార్కిటిక్ మిడ్జ్

రండు చిన్న కీటకాలు... ప్రపంచ రికార్డులు సాధించాయి... అందరినీ ఆశ్చర్యంలో ముంచేశాయి... ఇంతకీ అవేంటీ? వాటి గొప్పేంటి?

ఒకటి భూమిలో 2 కిలోమీటర్ల లోతులో ఉంటుంది. మరోటి గడ్డకట్టుకుపోయే మంచులో చల్లగా బతికేస్తోంది. అయితే ఏంటీ గొప్ప? భూమ్మీదే అతిలోతైన ప్రదేశంలో, అతి చల్లటి వాతావారణంలో ఉండేవిగా ఇవి రికార్డు సాధించాయి. మరి వీటి విశేషాలు తెలుసుకుందామా?

అంతా చీకటే!

ఈకీటకం ఎక్కడుంటుందో తెలుసా? ప్రపంచంలోనే అతి లోతైన గుహలో. జార్జియా నల్లసముద్రం దగ్గరి కాకాసస్ పర్వతాల్లో ఉన్న క్రూబెరా బొరొంజా గుహలో. ఈ గుహ 7,188 అడుగుల(2,190 మీటర్లు) లోతు వరకూ ఉంటుంది. అంటే 2 కిలోమీటర్ల పైబడిన లోతన్నమాట! అక్కడ చిమ్మ చీకటి. ఆ భయంకరమైన ప్రాంతంలో ఈ కీటకం హాయిగా బతికేస్తోంది. భూమ్మీద ఇంత లోతులో బతికే జీవి ఇదేనని శాస్త్రవేత్తలు కనిపెట్టారు. గతంలో ఆ రికార్డు మెక్సికోలోని ఓ గుహలోపల ఉండే ఓ తేలుకు, సిల్వర్‌ఫిష్ అనే కీటకానికి ఉండేది.
ఇప్పుడు కనుగొన్న కీటకానికి అసలు కళ్లు కనిపించవు. రెక్కలు కూడా లేవు. ఆరుకాళ్లున్నాయి. పేరు ప్లుటోమురస్ ఆర్టొబాలగనెన్సిస్ (Plutomurus Ortobalaganensis). అంత పెద్ద పేరెందుకు గానీ గుడ్డి పురుగంటే సరిపోతుంది. అక్కడ ఉండే బూజు లాంటి పదార్థాన్ని తింటూ గుహలో గుట్టుగా బతికేస్తోంది. ఈ జాతికి చెందిన కీటకాలు లక్షల ఏళ్ల నుంచి ఇక్కడ ఉంటున్నాయని తేలింది. దీన్ని కనిపెట్టడానికి శాస్త్రవేత్తలు ఎన్నో నెలల కష్టపడ్డారు. తాళ్లేసుకుని గుహలోకి దిగి పరిశోధన చేసినప్పుడు ఇది బయటపడింది.

మంచులో మాణిక్యం!

దక్షిణ ధ్రువమైన అంటార్కిటిక్ ప్రాంతం చలికాలం వచ్చిందంటే మొత్తం గడ్డకట్టుకుపోతుంది. మంచులో నివసించే ఏ జంతువులూ ఆ చలిలో ఉండలేవు. మంచు గడ్డకిందుండే నీటిలోకి వెళ్లిపోతాయి. ఒక కీటకం మాత్రం మంచులో మాణిక్యంలా ఎంత చలినైనా తట్టుకుని బతికేస్తోంది. అదే అంటార్కిటిక్ మిడ్జ్. అందుకే భూమ్మీద అతి చల్లదనంలో బతికే జీవిగా ఇది రికార్డు కొట్టింది.
ఇది తన జీవితకాలంలో రెండేళ్లపాటు లార్వా దశలోనే ఉంటుంది. పెద్దయ్యాక కేవలం 10 నుంచి 14 రోజులు మాత్రమే బతుకుతుంది. ఆ సమయంలోనే గుడ్లు పెట్టి చనిపోతాయి. అసలు అంత చలిలో ఇవి ఎలా బతగ్గలుగుతున్నాయో తెలుసా? గడ్డకట్టుకుపోయి శరీరంలో 70 శాతం నీటిని కోల్పోయినా బతికే శక్తి దీనికుంది. ఈ విద్య మరే జీవికీ లేదు. అంటే ఇది చాలా మొండి కీటకమన్నమాట