*దీని పేరు బ్లూ ప్యారట్ ఫిష్. ఈ చేపలు ఎక్కువగా కోరల్ రీఫ్ రాళ్ల దగ్గర ఉంటాయి. ఈ చేప సుమారు 29 అంగుళాల వరకు ఎదుగుతుంది. నోట్లో దంతాలతో పాటు దీనికి గొంతులోనూ పళ్లుంటాయి. వీటిని పారింగ్జల్ టూత్ అంటారు. చిలుక ముక్కులాంటి దీని దవడ, దంతాలతో రాళ్లపై ఉన్న ఆల్గేను తొలుస్తూ కడుపు నింపుకుంటుంది. గొంతులోని పళ్లతో ఏకంగా రాళ్లనే ఇసుకలా తొలిచి అందులో నాచును తినేస్తుంది. అలా రోజు మొత్తంలో 80 శాతం సమయం ఇది ఆహార వేటలో గడుపుతుంది.
* ఈ చేప ఆల్గేను తిని రీఫ్‌లపై దాని వ్యాప్తిని ఆపడం ద్వారా మిగతా చేపలకు కూడా రీఫ్‌లు ఆవాసమవుతున్నాయి. కానీ ఈ నీలి చేప క్రమంగా అంతరించిపోతుండడం వల్ల రీఫ్‌లపై నాచు అధికంగా పేరుకుపోయి బోలెడు చేప జాతులకు నష్టం కలుగుతోంది. ముఖ్యంగా బ్రెజిల్‌లోని సముద్రాల్లోని రీఫ్‌లు బాగా దెబ్బతింటున్నాయట. అందుకే నీలి చేపమ్మా నీ విలువ తెలిసింది అంటూ శాస్త్రవేత్తలు ఈ చేపను కాపాడే చర్యలు మొదలెట్టారు.
* చిలక ముక్కులాంటి దవడ ఉంటుంది కాబట్టి ఈ జాతి చేపల్ని ప్యారట్‌ఫిష్ అంటారు. కానీ దీని రంగుని బట్టి బ్లూ ప్యారట్‌ఫిష్ అని పేరు పెట్టారు.
* ఆహారం కోసం సముద్రంలో పగడపు దీవుల్లోని రాళ్లను పళ్లతో గీరడం వల్ల బోలెడంత ఇసుక తయారవుతుంది. ఇలా ఒకో చేప ఏడాదికి సుమారు 90 కిలోల ఇసుకను తయారుచేస్తుందని అంచనా. కొన్ని బీచ్‌ల్లో తెల్లగా కనిపించే ఇసుక వీటి వల్ల ఏర్పడినదే.
* మనకు ముద్దు పేర్లున్నట్టే వీటికి కూడా బ్లూ క్వాబ్స్, బ్లూ ప్యారట్స్, బ్లూమ్యాన్ అంటూ బోలెడు పేర్లున్నాయి.
* ఇవి ఎక్కువగా అట్లాంటిక్, కరిబీయన్ సముద్రాల్లో ఉంటాయి.
No comments:
Post a Comment