dinola peddanna

అరవై అడుగుల భారీ ఆకారం... పది కోట్ల సంవత్సరాల క్రితం నాటి జీవి... ఇవి ఓ డైనో సంగతులు... దాని ముచ్చట్లు చెప్పడానికి మన ముందుకొచ్చింది... మరి వినండి!
నన్ను చూసి 'ఏంటీ ఈ వింత డైనో అనుకుంటున్నారా?'. నా రూపమే నా ప్రత్యేకత. ఇప్పటి వరకు భూమిపై ఉన్న జీవుల్లో నాదే పే...ద్ద ఆకృతి. డైనోల్లోనే అతి పెద్ద ఆకారమున్న పెద్దన్నను. మీకు సరదాగా నా సంగతులు చెప్పాలని ఇలా వచ్చా.
* మీ శాస్త్రవేత్తలు ఈ మధ్యే నన్ను కనుగొన్నారు. ఎక్కడో తెలుసా? చైనాలో Lanzhou-Minhe  పరివాహక ప్రాంతంలో నా శిలాజాలు దొరికాయి. వాటిని బట్టి కంప్యూటర్లో ఊహా చిత్రం గీస్తే ఇలా నా ఆకృతి వచ్చింది. అంతేకాదు నా గురించి ఆసక్తికరమైన విషయాలు కూడా బయట పడ్డాయి.
* మేము ఎంత పొడవుండేవాళ్లమంటే ఏకంగా 60 అడుగులు! అంటే సుమారు రెండు బస్సుల పొడవంత. భూమిపై తిరగాడిన జీవుల్లో మాదే భారీ ఆకారమని మీ పరిశోధకులు అంటున్నారు.

* కేవలం మా భుజం ఎముకలే దాదాపు ఆరున్నర అడుగులు. అంటే మీ మనుషులకన్నా ఎక్కువ పొడవన్నమాట.
* పెన్సిల్వేనియా విశ్వవిద్యాలయానికి చెందిన శాస్త్రవేత్తలు చేసిన ఈ పరిశోధనలో నా పళ్లు, వెన్నెముక, భుజం ఎముకలు దొరికాయి. వాటిని పూర్తిగా పరిశీలించి వివరాలు తెలుసుకున్నారు.
* నా శరీర నిర్మాణం 1929లో చైనాలో దొరికిన మా జాతి డైనో నిర్మాణానికి దగ్గరగా ఉందని గుర్తించారు.
* నా రూపమే కాదు పేరు కూడా బారెడుంది. నోరు తిరగడమే కష్టం. Yongjinglong datangi  అంటారు. దీనికి చైనాలో డ్రాగన్ అని అర్థం. ఇక మా జాతి సారోపాడ్ (sauropod). ఇప్పటి వరకు దొరికిన మా జాతి అవశేషాలను, నా శిలాజాలతో పరిశీలించి మీ శాస్త్రవేత్తలు మా మధ్య సంబంధాన్ని అధ్యయనం చేస్తున్నారు.
* ఆకారంలో భయంకరంగా ఉన్నా మేము ఎలాంటి హానీ చేయం. పూర్తిగా శాకాహారులం. ఆకులు అలములు తింటూ బతికేవాళ్లం.
* మేం బతికింది 100 మిలియన్ సంవత్సరాల క్రితం.అంటే దాదాపు పది కోట్ల ఏళ్లన్నమాట. అప్పుడు వాతావరణం ఇప్పుడున్నట్లు కాక భిన్నంగా ఉండేది.
* ఇక ఉంటానే. మీతో కాసేపు సరదాగా గడిపినందుకు నాకు చాలా సంతోషంగా ఉంది!